काठमाडौं– गृहमन्त्री रमेश लेखकले भक्तपुरको गठ्ठाघरमा भएको सवारी दुर्घटनाको गम्भीरतापूर्वक छानबिन गर्न नेपाल प्रहरीका प्रहरी महानिरीक्षक (आईजीपी) लाई निर्देशन दिएका छन् ।

गृहमन्त्री लेखकले गम्भीरतापूर्वक दुर्घटना कारण खोज्न आइजीपी वसन्त कुँवरलाई निर्देशन दिएका हुन् ।गृहमन्त्रीको सचिवालयका अनुसार दुर्घटनाबारे दुःख व्यक्त गर्दै उनले भने, ‘गठ्ठाघरको दुर्घटनामा के भएको हो ? दुर्घटना हुनुमा कसैको गल्ती छ कि ? यसमा हाम्रो पुलिस फोर्सको गल्ती छ कि ? यसको गम्भीरतापूर्वक छानबिन गर्नुहोस् ।’

बिहीवार दिउँसो गठ्ठाघर चोकनजिकै ट्रकले ठक्कर दिँदा स्कूटर चालकको घटनास्थलमै मृत्यु भएको थियो । ना६ख २१७३ नम्बरको ट्रकले बा३९प ८९४४ नम्बरको स्कूटरलाई ठक्कर दिँदा स्कूटर चालक ओखलढुंगा स्थायी घर भएका उत्तम कोइरालाको मृत्यु भएको प्रहरीले जनाएको छ ।