काठमाडौं-सरकारले २३ निर्माण कम्पनी र आपूर्तिकर्ता फर्महरूलाई कालोसूचीमा राख्ने निर्णय गरेको छ ।

सार्वजनिक खरिद अनुगमन कार्यालयले आज एक सूचना जारी गर्दै ती कम्पनीहरूलाई कालोसूचीमा राखिएको जानकारी दिएको हो ।

कार्यालयका अनुसार, असोज २९ गतेको निर्णयका आधारमा सूचना प्रकाशित भएको मितिदेखि नै यो निर्णय लागू हुनेछ।

कालोसूचीमा परेका निर्माण व्यवसायी र आपूर्तिकर्ताहरूलाई अबदेखि सार्वजनिक निकायहरूले सञ्चालन गर्ने कुनै पनि खरिद प्रक्रिया वा ठेक्का कार्यमा सहभागी हुन नपाउने व्यवस्था गरिएको छ।

कार्यालयले सार्वजनिक खरिद ऐन र नियमावली उल्लङ्घन गर्ने, सम्झौता तोड्ने वा काम समयमा सम्पन्न नगर्ने कम्पनीहरूलाई कालोसूचीमा राखिएको बताएको छ।