काठमाडौं– राष्ट्रिय स्वतन्त्र पार्टी (रास्वपा) बाट गोरखा–१ को उम्मेदवार बनेका सुदन गुरुङले गत भदौमा भएको जेनजी आन्दोलनमा पहिले सुरक्षाकर्मीबाट गोली चलेको दाबी गरेका छन् । हामी नेपालका संस्थापक समेत रहेका सुदनले सोमबार बिहान सामाजिक सञ्जालमार्फत आन्दोलनका क्रममा पहिला सुरक्षाकर्मीको गोली चलेपछि मात्रै अन्य विध्वंशात्मक गतिविधि भएको बताएका हुन् ।

जेनजी आन्दोलनपछि त्यसको अगुवाको रूपमा परिचित बनेका गुरुङले सामाजिक सञ्जालमार्फत सरकार र सुरक्षा संयन्त्रको भूमिकामाथि गम्भीर प्रश्न उठाएका छन् । उनका अनुसार आन्दोलनको सुरुवात शान्तिपूर्ण ढंगले भएको थियो, तर सुरक्षाकर्मीले गोली चलाएपछि अवस्था नियन्त्रणबाहिर गएको हो। ‘गोली पहिला चलेको हो, त्यसपछि सिंहदरबार जलेको हो,’ गुरुङले सामाजिक सञ्जालमा लेखेका छन्, ‘बच्चाहरू सुरुमा ढलेका हो, त्यसपछि मात्र संरचना बलेको हो। स्मरण रहोस् !’