काठमाडौं – अमेरिकी राष्ट्रपति डोनाल्ड ट्रम्प इरानसँग दुई हप्ताका लागि युद्धविराम गर्न सहमत भएका छन्।

स्ट्रेट अफ हर्मुज तुरुन्त खोल्ने शर्तमा यस्तो सहमति गरिएको ट्रम्पले सामाजिक सञ्जाल ‘ट्रुथ सोसल’ मार्फत जनाएका छन्। ट्रम्पका अनुसार यो युद्धविराम दुईपक्षीय हुनेछ, जसमा अमेरिका र इरान दुवैले आक्रमण रोक्नेछन्। यससँगै इजरायलले पनि अस्थायी रूपमा आफ्नो सैन्य कारबाही रोक्न सहमति जनाएको ह्वाइट हाउसले जनाएको छ।

यो सहमति पाकिस्तानका प्रधानमन्त्री सहबाज सरिफको पहलपछि आएको खबरमा उल्लेख छ। उनले अमेरिका र इरानबीच कूटनीतिक वार्ताका लागि दुई हप्ताको समय दिन युद्धविराम प्रस्ताव गरेका थिए। यसबीच, इरानले भने आफूले अमेरिका माथि ‘ठूलो विजय’ हासिल गरेको दाबी गर्दै १० बुँदे प्रस्ताव स्वीकार गराएको जनाएको छ।

ट्रम्पले पनि यो प्रस्ताव वार्ताका लागि उपयुक्त आधार भएको बताएका छन्। युद्धविराम घोषणासँगै अमेरिकी शेयर बजार उकालो लागेको छ भने कच्चा तेलको मूल्य घटेको छ।

विश्लेषकहरूका अनुसार यो कदमले मध्यपूर्वमा दीर्घकालीन शान्ति स्थापनाको सम्भावना बढाएको छ।

राष्ट्रपति डोनाल्ड ट्रम्पले इरानको नागरिक पूर्वाधार ध्वस्त पार्ने चेतावनीसहित दिएको कडा समयसीमा सकिदै गर्दा यो सहमति बनेको हो।

यसअघि ट्रम्पले इरानलाई चेतावनी दिँदै हर्मुज जलमार्ग नखोलेमा कडा आक्रमण गर्ने अल्टिमेटम दिएका थिए। पाकिस्तानको सक्रिय कूटनीतिक पहलले गर्दा तत्कालको लागि ठूलो युद्ध टरेको देखिएको छ।

युद्धविरामको यो दुई हप्ताको अवधिमा वार्ता सफल भएमा यसले क्षेत्रमा स्थायी शान्तिको बाटो खोल्ने विश्वास गरिएको छ।