काठमाडौं-काठमाडौंको शंखरापुर नगरपालिका–३ लप्सी फेदीका स्थानीयले सुरक्षाकर्मीमाथि आक्रमण गरेका छन्। नेपाल प्रहरी र सशस्त्र प्रहरी बलको सुरक्षा पोस्ट राख्ने निर्णयको विरोधमा उत्रिएका स्थानीयले सुरक्षाकर्मीमाथि आक्रमण गरेका हुन्।

जिल्ला सुरक्षा समिति, काठमाडौँको निर्णयबाट त्यहाँ निर्माण हुने विद्युत् सबस्टेसन र त्यस क्षेत्रको सुरक्षा संवेदनशीलतालाई ध्यान दिएर प्रहरी नायब उपरीक्षकको नेतृत्वमा सशस्त्र प्रहरीको बेस क्याम्प र नेपाल प्रहरीको पोष्ट राख्ने निर्णय गरेको थियो । निर्णयपछि सुरक्षा क्याम्प राख्न पुगेका सुरक्षाकर्मीमाथि स्थानीयले आक्रमण गरेका हुन्।

स्थानीयहरुले रूख ढालेर बाटो अवरूद्ध गर्नुका साथै सुरक्षाकर्मीहरूलाई ढुंगामुढा गर्दै आक्रमण गरेका छन्। त्यस क्रममा केही प्रहरी घाइते भएका छन्। प्रहरीले आक्रमणमा संलग्न ४ जनालाई नियन्त्रणमा लिएको छ।

नेपाल विद्युत प्राधिकरणले शङ्खरापुर नगरपालिका–३ स्थित बोझेनीमा तामाकोशी तथा सुनकोशी नदी र तिनीहरूका सहायक खोलाहरूमा निर्माण भएका तथा हुने जलविद्युत् आयोजनाको विद्युत् काठमाडौँ उपत्यकामा ल्याउन र स्थानीय रूपमा आपूर्तिका लागि ४००-२२०-१३२-११ केभी सबस्टेसन निर्माण गर्न लागिरहेको छ ।

सबस्टेसन निर्माणका लागि आवश्यक पर्ने ५० जना जग्गाधनीका करिब एक सय ७४ रोपनी जग्गा अधिग्रहण गरिएको छ । जग्गा अधिग्रहणका लागि २०७४ जेठमा सार्वजनिक सूचना प्रकाशित गरी सोही वर्षको माघमा मुआब्जा तथा क्षतिपूर्ति रकम निर्धारण गरिएको थियो । जग्गाधनीहरूले मुआब्जा तथा क्षतिपूर्ति रकम राजीखुसीले बुझिसकेका छन् । मुआब्जा तथा क्षतिपूर्तिवापत करिब ५० करोड रुपैयाँ वितरण गरिएको छ ।