पर्सा-नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले चैत्र १५ गतेको प्रदर्शनपछि राजनीति ट्र्याकमा आउने बताएका छन् ।

पर्साको ठोरी गाउँपालिकामा आयोजित जनसभालाई सम्बोधन गर्ने क्रममा बोल्दै अध्यक्ष प्रचण्डले सो कुरा बताएका हुन् ।

उनले आगामी १५ गते काठमाडौंमा हुने जनप्रदर्शनपछि देशको राजनीति सहि ट्र्याकमा आउने आधार तय हुने जिकिर गरे ।

अध्यक्ष प्रचण्डले संघीय लोकतान्त्रिक गणतन्त्रको पक्षमा हुने उक्त सभामा सहभागी हुन पनि सर्वसाधरणलाई आग्रह गरे ।

अध्यक्ष प्रचण्डले भने,‘यो सरकार उल्टो बाटो हिँडिरहेको छ । त्यसकारण यसलाई बढी नै सजक गराउनुपर्ने खबरदारी गर्नुपर्ने आवश्यकता छ । त्यसमा तपाईंहरू पनि ठूलो संख्यामा उपस्थित हुन आग्रह गर्दछु, यो आउँदो १५ गते।’

उक्त सभापछि पुनः एकपटक जनताको पक्षमा काम गर्ने वातावरण बन्ने विश्वास प्रचण्डले दिलाएका छन् ।