काठमाडौं-राष्ट्रपति रामचन्द्र पौडेलले संविधानले दिएको अधिकार प्रयोग गर्दा त्यही संविधानले अपेक्षा गरेको लोकतान्त्रिक संस्कृति र संस्कार विर्सन नमिल्ने बताएका छन् ।

रेडियो नेपालको हीरक महोत्सवलाई सम्बोधन गर्दै राष्ट्रपति पौडेलले लोकतन्त्रमा जनताको अभिमत सबैभन्दा ठूलो हुने र संविधानको व्यवस्था,मर्म र भावना भुले नेपाली जनतालाई स्वीकार्य नहुने बताए ।

बुधबार काठमाडौंमा आयोजित महोत्सबमा उनले संविधानले प्रत्येक नागरिकलाई आफ्नो असहमति राख्ने अधिकार प्रदान गरेको र संघीय लोकतान्त्रिक गणतन्त्रको यो सर्वाधिक सुन्दर पक्ष भएको बताए ।

राष्ट्रपति पौडेलले केही दिनअगाडि काठमाडौंमा भएको हिंसा, तोड़फोड़, आगजनी र लूटपाट र जनधनको क्षतिप्रति दुःख व्यक्त गर्दै होनाहार पत्रकार र नागरिकको मृत्यु हुनु दुःखद् भएको बताए।

कार्यक्रममा संविधानले व्यवस्था गरेको नागरिकको सूचनाको हक प्रत्याभूत गर्न रेडियो नेपालले पुराएको योगदानको चर्चा गर्दै राष्ट्रपति पौडेलले लोकतन्त्र स्थापनासँगै मुलुकमा आमसञ्चार माध्यमको विकास र विस्तारले गति लिएको उल्लेख गरे।