भैरहवा-राष्ट्रिय स्वतन्त्र पार्टीका सभापति रवि लामिछानेलाई भैरहवा ल्याइएको छ ।

काठमाडौंमा पक्राउ परेका पूर्वगृहमन्त्री एवं गोर्खा मिडिया नेटवर्कका तत्कालीन प्रबन्ध निर्देशक समेत रहेका लामिछानेलाई यति एयरलाइन्सको विमानमार्फत भैरहवा ल्याइएको हो ।

उनलाई भैरहवा विमानस्थलबाट सिधै जिल्ला प्रहरी कार्यालय रुपन्देही लगिएको छ । सहकारी ठगीसम्बन्धी मुद्दामा उच्च अदालत तुलसीपुर बुटवल इजलासले शुक्रबार थुनामा राख्न आदेश दिएपछि प्रहरीले लामिछानेलाई शुक्रबार राति काठमाडौँबाट पक्राउ गरेको थियो ।

अब उनलाई शनिबार र आइतबार जिल्ला प्रहरी कार्यालय रुपन्देहीको हिरासतमा राखिने छ । सोमबार लामिछानेलाई अदालतमा पेस गरिने प्रहरीले जनाएको छ । त्यसपछि मात्रै उनलाई कारागार चलान गरिनेछ ।

लामिछानेलाई बुटवलस्थित सुप्रिम बचत तथा ऋण सहकारी संस्था ठगी र संगठित अपराध मुद्दाको अभियोगमा जिल्ला अदालत रुपन्देहीले एक करोड धरौटीमा छाड्न आदेश गरेको थियो ।

तर शुक्रबार न्यायाधीश शुक्रबार न्यायाधीश रमेश ढकाल र स्वीकृती पराजुलीको इजलास सुनुवाइ गर्दै जिल्ला अदालतको आदेश बदर गर्दै लामिछानेलाई थुनामा पठाउने आदेश गरेको थियो ।