काठमाडौं-प्रधानमन्त्री केपी शर्मा ओलीले रामनवमी पर्व, २०८१ का अवसरमा शुभकामना व्यक्त गरेका छन् । सामाजिक सञ्जाल फेसबुकमार्फत प्रधानमन्त्री ओलीले शुभकामना दिएका हुन् ।

उनले त्रेता युगमा जन्मेका रामलाई हाम्रो प्राचीन शास्त्र रामायणले शान्ति, न्याय, धर्म, सदाचार, सुव्यवस्था, सुशासन र कर्तव्यपरायण आदर्श चरित्र मान्दै आएको बताए ।

उनले लेखेका छन्, ‘आज चैत्र शुक्ल नवमी, चैते दशैं, अर्थात् रामनवमी। त्रेता युगमा जन्मेका रामलाई हाम्रो प्राचीन शास्त्र रामायणले शान्ति, न्याय, धर्म, सदाचार, सुव्यवस्था, सुशासन र कर्तव्यपरायण आदर्श चरित्र मान्दै आएको छ। प्राचीन सभ्यतामा असल शासन भएका मुलुकलाई रामराज्य भन्ने गरिन्थ्यो। लोकप्रियताभन्दा मर्यादाको बाटो हिँडेकाले राम मर्यादा पुरुषोत्तमको प्रतीक मानिन्छन् । सबैलाई रामनवमी र चैते दशैंको शुभकामना !’

चैत्र शुक्ल नवमीका दिन मनाइने रामनवमी पर्व आज श्रद्धा भक्तिपूर्वक भगवान् श्री रामचन्द्रको पूजा आराधना गरी मनाइँदैछ ।