काठमाडौं-प्रधानमन्त्री केपी शर्मा ओली अस्वस्थ रहेको भन्दै आज संसदमा जवाफ दिने कार्यक्रम स्थगित गरिएपनि उनी राजनीतिक भेटघाटमा ब्यस्त छन् ।

प्रधानमन्त्री ओली र नेपाली कांग्रेसका सभापति शेरबहादुर देउवाबीच भेटवार्ता भएको छ ।

प्रधानमन्त्री निवास बालुवाटारमा भएको भेटमा समसामयिक राजनीतिक अवस्थाबारे छलफल भएको प्रधानमन्त्रीको सचिवालयले जनाएको छ ।

प्रधानमन्त्री ओली र देउवाबी हिजै भेट्ने कार्यक्रम थियो । तर हिजो भेट हुन नसकेपछि आज भेट भएको हो ।’

हिजो ओली र देउवा भेटेर नेपाल राष्ट्र बैंकमा गभर्नर हुने व्यक्तिमा सहमति जुटाउने र मन्त्रीपरिषद् बैठकले गभर्नर नियुक्ति गर्ने सहमति थियो । तर, देउवासँग नै भेट हुन नसकेपछि मन्त्रीपरिषद् बैठक पनि बस्न सकेन ।

यद्यपी हिजो पनि प्रधानमन्त्रीको स्वास्थ्यको कारण देखाउँदै देउवासँगको भेट आजका लागि सारिएको थियो ।

आज पनि स्वास्थ्य त्यति राम्रो नभए पनि बाहिरको कार्यक्रममा सहभागी नभई प्रधानमन्त्री निवासमै भेटघाटको कार्यक्रम राखिएको प्रधानमन्त्रीको सचिवालयले जनाएको छ ।

प्रधानमन्त्रीको अस्वस्थताको कारण आज संसदमा जवाफ दिने कार्यक्रम भने स्थगित गरिएको छ ।