काठमाडौं– नेपालले आईसीसी महिला टी–२० विश्वकप ग्लोबल छनोटमा पहिलो जित हासिल गरेको छ । शनिबार त्रिवि क्रिकेट मैदानमा भएको तेस्रो खेलमा पूजा महतोको अविजित अर्धशतकीय इनिङ्सको सहयोगमा नेपालले जिम्बाबेलाई ६ विकेटले पराजित गरेको हो ।

जिम्बाबेले दिएको १३० रनको लक्ष्य नेपालले ३ बल बाँकी रहँदा ४ विकेट गुमाएर पूरा गर्‍यो । पूजा महतोले ५० बलमा ४ चौका र २ छक्कासहित अविजित ५२ रन बनाइन् । कप्तान इन्दु बर्माले २२ रनको योगदान दिइन् । यसअघि टस हारेर पहिले ब्याटिङ गरेको जिम्बाबेले निर्धारित २० ओभरमा ६ विकेटको क्षतिमा १२९ रन बनाएको थियो । जिम्बाबेका लागि केलिस धलोभुले अविजित ५२ रन बनाउँदा बिलभ्ड बिजाले ३४ तथा मोडेस्टर मुपाचिवाले १४ रन जोडिन् ।

नेपालका बलरमध्ये रिया शर्माले २ विकेट लिइन् भने कविता कुँवर, पूजा महतो, सीता रानामगर र रुबिना क्षेत्रीले समान १–१ विकेट हात पारिन्। नेपाल पहिलो खेलमा थाइल्यान्डसँग ८ विकेटले र दोस्रामो नेदरल्यान्ड्ससंग २ रनले पराजित भएको थियो । नेपालले अब समूह चरणको अन्तिम खेलमा सोमबार स्कटल्यान्डसँग खेल्नेछ ।