काठमाडौं-पूर्वप्रधानन्यायाधीश सुशीला कार्की प्रधानमन्त्री नियुक्त भएसँगै मुलुकमा देखिएको राजनीतिक अन्योल क्रमशः हट्न थालेको छ। पछिल्ला दिनमा अराजक र हिंसात्मक प्रदर्शनले अस्तव्यस्त बनेको जनजीवन बिस्तारै सामान्यतर्फ फर्किएको छ।

मङ्गलबारको प्रदर्शनपछि नेपाली सेनाले देशभर कर्फ्यु र निषेधाज्ञा लागू गरेको थियो। तर अब स्थानीय प्रशासनलाई आवश्यकता अनुसार मात्र निर्णय गर्ने अधिकार दिइएपछि कतिपय क्षेत्रमा कर्फ्यु हटाइएको छ।

सैनिक जनसम्पर्क निर्देशनालयले काठमाडौं उपत्यकामा हिजो बेलुकी ७ बजेदेखि आज बिहान ६ बजेसम्म कर्फ्यु घोषणा गरेको थियो। त्यसपछि थप निर्णय नभएपछि आज काठमाडौंमा कर्फ्यु वा निषेधाज्ञा लागू गरिएको छैन।

ललितपुर र भक्तपुर प्रशासनले भने बिहान ११ बजेदेखि दिउँसो ५ बजेसम्म निषेधाज्ञा र बेलुकी ७ बजेदेखि भोलि बिहान ६ बजेसम्म कर्फ्यु जारी गर्ने निर्णय गरेका छन्। अन्य केही जिल्लामा पनि कर्फ्यु र निषेधाज्ञा निरन्तरता पाएको छ।

यद्यपि धेरै ठाउँमा दैनिक जीवन सामान्यतर्फ फर्किएको छ। लामोदूरीका गाडी सञ्चालन हुन थालेका छन् भने काठमाडौं उपत्यकामा पनि सार्वजनिक यातायात आंशिक रूपमा चल्न थालेको छ।