काठमाडौं – यातायात व्यवस्था विभागले सार्वजनिक सवारीसाधनमा विद्यार्थीलाई दिइँदै आएको ४५ प्रतिशत भाडा छुट अनिवार्य रूपमा लागू गर्न निर्देशन दिएको छ ।

हालै यातायात व्यवसायी र सरोकारवाला निकायलाई परिपत्र गर्दै विभागले सहुलियत कडाइका साथ लागू गर्न ताकेता गरेको हो।

हाल इन्धनको मूल्य बढेपछि केही गाडीहरूले विद्यार्थीलाई छुट नदिएको गुनासो बढेको छ । विद्यार्थीहरूले ‘हेलो सरकार’ र गुनासो पेटिकामा पनि छुट नपाएको उजुरी दिएका छन् ।

विद्यार्थी परिचयपत्र देखाउँदा पनि छुट नदिने, दुर्व्यवहार गर्ने घटना बढेपछि विभागले कडा रूपमा नियम पालना गर्न निर्देशन दिएको हो ।

विभागका अनुसार २०६५ फागुन २० गते सरकार र यातायात व्यवसायीबिच भएको निर्णय बमोजिम विद्यार्थीहरूले सवारी भाडामा ४५ प्रतिशत सहुलियत पाउने व्यवस्था छ।

सरकारले तोकेको यो सहुलियत कार्यान्वयन नगर्ने सवारी साधनलाई कारबाहीको दायरामा ल्याइने समेत विभागले जनाएको छ।