काठमाडौं – फिफा विश्वकपको समूह चरणअन्तर्गत ब्राजिल र मोरक्कोबीचको बहुप्रतीक्षित भिडन्त १–१ को रोमाञ्चक बराबरीमा सकिएको छ। दुवै टोलीले आक्रामक खेल प्रदर्शन गरे पनि दोस्रो हाफमा गोल निस्कन नसक्दा अंक बाँड्न बाध्य भए।

खेलको २०औँ मिनेटमा मोरक्कोका इस्माइल सैबारीले उत्कृष्ट गोल गर्दै टोलीलाई सुरुआती अग्रता दिलाएका थिए। तर ब्राजिल धेरै बेर दबाबमा रहेन।

त्यसको ११ मिनेटपछि स्टार फरवार्ड भिनिसियस जुनियरले गोल गर्दै खेललाई १–१ को बराबरीमा ल्याए।

पहिलो हाफमै दुवै टोलीले एक–एक गोल गरेपछि दोस्रो हाफ थप प्रतिस्पर्धात्मक बनेको थियो। दुवै पक्षले जितका लागि निरन्तर प्रयास गरे पनि गोलरक्षक र रक्षापङ्क्तिको मजबुत प्रदर्शनका कारण थप गोल हुन सकेन।

विश्वकप इतिहासमा ब्राजिल र मोरक्कोबीच ३८ वर्षपछि भएको यो दोस्रो भेट थियो। यसअघि सन् १९८६ को विश्वकपमा भएको खेलमा ब्राजिलले मोरक्कोलाई ३–० ले पराजित गरेको थियो।

तर यसपटक मोरक्कोले बलियो ब्राजिललाई बराबरीमा रोक्दै आफ्नो क्षमता फेरि एकपटक प्रमाणित गरेको छ।